«Քվանտ» վարժարանը, հավատարիմ իր կոչմանն ու առաքելությանը, արդեն 28-րդ տարին է՝ կազմակերպում և փայլուն իրականացնում է մի հիանալի նախաձեռնություն՝ մրցույթ մաթեմատիկա առարկայից։
Գեղեցիկ ավանդույթի վերածված այդ նախաձեռնության նպատակը օժտված երեխաներ հայտնաբերելն ու նրանց հետագա ուսումը հովանավորելն է: Ամեն տարի այդ մրցույթին մասնակցում են 5-9-րդ դասարանների բազմաթիվ սովորողներ ինչպես մայրաքաղաք Երևանի, այնպես էլ հանրապետության տարբեր մարզերի հանրակրթական դպրոցներից: Ուրախալի է այն փաստը, որ վերջին տարիներին աննախադեպ մեծացել է թե´ մասնակիցների թիվը, թե´ աշխարհագրությունը։
Այս տարի ևս տարբեր տարիքային խմբերի շուրջ 500 մասնակիցներից վերջին՝ բանավոր փուլ անցան լավագույն արդյունքներ արձանագրած սովորողները։ Առավելագույն միավորներ վաստակած 49 սովորող դարձան այս տարվա մրցույթի հաղթողներ: Այդպիսով նրանք իրավունք են ստանում արտոնյալ պայմաններով սովորելու վարժարանում, ինչպես նաև Միջազգային բակալավրիատի համակարգում և հետագայում համալրում են միջազգային օլիմպիադաներում բարձունքներ նվաճած քվանտականների շարքերը: Ուշագրավ է այն, որ հաղթողների շարքերում կան ոչ միայն վարժարանի, այլև ՀՀ տարբեր մարզերի մի շարք դպրոցների սովորողներ։
Ոգևորիչ է նաև այն հանգամանքը, որ մրցույթի երկրորդ փուլ անցած, բայց չհաղթած պատանիները ևս ձեռնունայն չմնացին. նրանք ստացան վարժարանի կողմից կազմակերպվող հեռավար դպրոցին մասնակցելու զեղչի հնարավորություն:
Խորապես հավատում ենք, որ մրցույթի հաղթողները ճիշտ կօգտագործեն իրենց տրված այս հիանալի հնարավորությունը և գիտելիքի ուժով կկարողանան նվաճել անգամ անհաղթահարելի բարձունքներ։
